历代志上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 大卫点算以色列人ê数额
(撒下24：1-25)
撒旦起来ài害以色列，引诱大卫算以色列人ê数额。
21:2 大卫kā约押kah人民中间ê首领讲：「Lín去算以色列人，tùi别是巴到但，tńg来kā我讲，hō͘我知in ê数额。」
21:3 约押讲：「愿上主hō͘他ê子民比现今加添百倍，我ê主—我ê王，in kám无lóng是我ê主ê人民？我ê主án怎命令chitê tāichì？án怎hō͘以色列犯罪？」
21:4 总是，王ê话赢过约押。约押to̍h出去遍行以色列地，koh tńg来耶路撒冷。
21:5 约押to̍h kā所算人民ê总额报告大卫：以色列人ēgia̍h刀ê有一百十万，偤大人ēgia̍h刀ê四十七万。
21:6 独独利未人kah便雅悯人伊无算在内，因为约押讨厌王chitê命令。
21:7 Chitê tāichì上帝看做m̄好，就phah以色列。
21:8 大卫对上帝讲：「我行chitê tāichì，大大有罪，taⁿ求祢除去祢ê奴仆ê罪，因为我所做ê真戆。」
21:9 上主吩咐大卫ê先见迦得，讲：
21:10 「你tio̍h去kā大卫讲，上主ánne讲：『Taⁿ我用三项排tī你面前，你拣一项，我thang行tī你ê身上。』」
21:11 迦得to̍h来见大卫，kā伊讲：「上主ánne讲：『你tio̍h kakī 拣，
21:12 看是三年ê饥荒，á是三月日tī你ê对敌ê面前tú tio̍h损害，hō͘仇敌ê刀剑jiok tio̍h你，á是三日上主ê剑，to̍h是瘟疫tī你ê国内，上主ê使者tī以色列ê全境teh毁灭。』Taⁿ你tio̍h想看，我thang用啥物话回覆差我ê。」
21:13 大卫kā迦得讲：「我困迫到极，我愿意陷落tī上主ê手，因为他ê怜悯真大，我m̄愿意陷落tī人ê手。」
21:14 就ánne，上主就降瘟疫tī以色列，以色列人死ê有七万。
21:15 上主差一个使者来到耶路撒冷beh kā它灭掉，teh beh kā她灭掉ê时，上主看tio̍h，就改变主意，kā毁灭ê使者讲：「够额à，taⁿ thang停你ê手。」Hit时，上主ê使者khiā tī耶布斯人阿珥楠 ê稻埕。
21:16 大卫gia̍h头看tio̍h上主ê使者khiā tī半空中，拔刀tī手里，伸tī耶路撒冷ê顶面。大卫kah chiahê长老lóng穿麻衫，面仆tī土脚。
21:17 大卫对上帝讲：「吩咐点算人民ê kám m̄是我？我犯罪行大pháiⁿ，总是，chiahê羊群kám有做啥物？求上主—我ê上帝，伸手tī我kah我ê父ê家，m̄ thang攻击祢ê子民，降瘟疫hō͘ in。」
21:18 Hit当时，上主ê使者命令迦得去kā大卫讲，大卫tio̍h上去，tī耶布斯人阿珥楠 ê稻埕，kā上主起一座坛。
21:19 大卫就照迦得奉上主ê名所讲ê话上去。
21:20 Hit时，阿珥楠teh phah麦，oa̍t头看tio̍h天使，kah伊做伙hit四个kiáⁿ走去bih。
21:21 大卫来到阿珥楠 hia，阿珥楠看tio̍h大卫，to̍h tùi稻埕出来，àⁿ头拜大卫。
21:22 大卫对阿珥楠讲：「你kā chitê稻埕ê地hō͘我，hō͘我tī hia thang kā上主起一座坛，你tio̍h照足额ê价钱卖我，hō͘瘟疫soah，无害tio̍h人民。」
21:23 阿珥楠 kā大卫讲：「你thang the̍h去用，愿我ê主—我ê王，照你所看做好ê去行。你看，我用牛hō͘你做烧祭，用phah五谷ê器具做柴，mā用麦á做素祭，chiahê我lóng hō͘你。」
21:24 大卫王kā 阿珥楠讲：「M̄是ánne，我绝对beh用足额ê价钱来买，因为我无ài the̍h你ê物hō͘上主，无ài用无开费来献烧祭。」
21:25 就ánne，大卫为tio̍h hit块地秤六百舍客勒ê金hō͘ 阿珥楠。
21:26 大卫tī hia kā上主起一座坛，献烧祭kah平安祭，koh求叫上主。上主tùi天降火tī祭坛顶来kā伊应答 。
21:27 上主命令使者，伊to̍hka7刀收入去鞘内。
21:28 Hit时，大卫看tio̍h上主tī耶布斯人阿珥楠 ê稻埕kā伊应答，to̍h tī hia献祭。
21:29 因为摩西tī旷野所造上主ê会幕kah烧祭ê坛，hit时lóng tī基遍koân ê所在。
21:30 总是，大卫bē tàng上到他ê面前来问上帝，因为伊惊上主ê使者ê刀。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。